هەردوو وەزارەتێن خواندنا بلند و کار، یاداشتنامەیەکا لێکتێگەهشتنێ ئیمزاکرن.
ب مەرەما زێدەتر نێزیکبون و پێکڤەگرێدانا پرۆگرامێن خواندنا زانکۆ و پەیمانگەهێن هەرێما کوردستانێ ب بازارێ کاری ڤە و زێدەتر ڕاهاتنا خواندەڤانان ب یاسایێن کاری، یاداشتنامەیەکا لێکتێگەهشتنێ د ناڤبەرا هەردوو وەزارەتێن خواندنا بلند و ڤەکولینێن زانستى و کار و کاروبارێن کۆمەڵایەتى هاتە ئیمزاکرن.
ل ڕێککەڤتی (2022/8/9) ب سەپەرشتییا (د. ئارام محمد قادر)، وەزیرێ خواندنا بلند و ڤەکولینێن زانستى و (کوێستان محمد)، وەزیرا کارو کاروبارێن کۆمەڵایەتى و ب ئامادەبونا بریکارێن هەردوو وەزارەتان و ڕاوێژکار و ڕێڤەبەریێن گشتى، د ڕێوڕەسمەکێدا یاداشتناما لێکتێگەهێشتنێ دناڤبەرا هەردوو وەزارەتان بۆ زێدەتر پێشڤەبرنا پرۆسەیا ب کارخستن و بنیادنانا کارامەیى هاتە ئیمزاکرن.
هەژی گوتنێ یە، وەزیرا کارو کاروبارێن کۆمەڵایەتى ئاماژەى ب وێ خالێ ژی دا کو ل دویڤ خالێن د یاداشتنامێدا هەماهەنگى دێ هێتە کرن د ناڤبەرا (بەشێن ب کارخستنێ و ڕێڤەبەریێن کار) یێن سەر ب وەزارەتا کار ل گەل (سەنتەرێن گەشەپێدان بۆ کار-CDC) یێن زانکۆیێن کوردستانێ. ژ بۆ تۆمارکرنا ناڤێن دەرچوویێن زانکۆ و پەیمانگەهان بۆ مەبەستا ڕاهێنان و دیتنا دەلیڤێن کاری ل کەرتێ تایبەت بۆ دەرچوویێن بێکار.